Leadership Ka Imtehan: Jab Madad Karne Walay Apni Shartain Rakhein

Aksar jab aap koi acha kaam kar rahay hotay hain, to log madad ke liye aatay hain, laikin unki apni shartain hoti hain. Aise mein aik leader ko kya karna chahiye?

Kisi bhi idaaray ko, kisi bhi club ko chalaana asaan kaam nahi hota. Khaas tor per jab aap ka maqsad logon ki khidmat karna ho, to aap ko har qisam ke logon se waasta parta hai. Bohat si mushkilaat aati hain aur bohat se faislay karnay partay hain.

Kabhi kabhi aise log bhi milte hain jo aap ke kaam se mutasir ho kar madad karna chahtay hain, laikin woh chahtay hain ke unki tasveer lagay, unko ohda milay, unki wah-wah ho. Unki khwahish hoti hai ke unhein appreciation milay, awards milein. Aise mein team ke andar bhi discussion shuru ho jaati hai ke kya karna chahiye.

Strategy yeh honi chahiye ke aisay logon ko system ke andar le kar aya jaye. Unko club join karnay ki dawat di jaye taake woh hamaray rules aur structure ke mutabiq chalein. Kal hum unke liye aik meeting bhi kar rahay hain, unko welcome kareingay aur club join karnay ki dawat deingay. Jab woh system ka hissa ban jayeinge, to cheezein khud behtar ho jayeingi.

Dekhein, madad aur qabzay mein farq hota hai. Aik banda hai jo kehta hai, 'Yeh lo 20 lakh rupay aur chabi pakro', matlab woh sab kuch control karna chahta hai. Aur aik banda hai jo kehta hai, 'Main kafalat karta hoon, aap kaam karo, aap ko paison ki zaroorat hai to pichay nahi hatna'. Humein doosri qisam ki support chahiye, jahan credit club ko milay.

Aik leader ka kaam yahi hota hai ke woh logon ko sath le kar chalay, sab ki anaa ka khayal bhi rakhay, aur apnay idaaray ke asal maqsad se bhi na hatay. Jab koi kehta hai ke meri photo bahar lagao, under supervision mera naam likho, to unko izzat do, unki photo bhi laga do. Laikin project apnay club ke naam per hi chalao. Yehi ek mushkil imtehan hota hai.