Denning Institute: woh skills jo degree nahi sikhati

Gyarah November ko Denning Institute of Technology & Entrepreneurship, Gujranwala mein "Skills Your Degree Won't Teach You" session: apne aap ko pehchanna, AI ke saath kaam, har company ke liye alag CV, aur masle se business ka idea.

**11 November 2026** ko Raheel Nawaz (WheelchairWala) **Denning Institute of Technology & Entrepreneurship, Gujranwala** mein guest speaker the. Mauzu: "**Skills Your Degree Won't Teach You — AI Skills & Innovation**". Ye **100 Institutions Mission** ka nawan padaao tha.

## Degree darwaza kholti hai, skill jagah banati hai

Raheel sb ne kaha: taleem kamyabi ki chaabi hai, parhai kabhi nahi chhorni. Lekin companies sirf degree nahi dekhti — wo masla hal karne wala aur apni baat bechne wala insaan dhoondti hain. World Economic Forum ki Future of Jobs Report 2025 ke mutabiq 2030 tak workers ki takreeban 39% core skills badal jayengi, aur sab se tez barhne wali skill AI aur big data hai.

## Skill 1: apne aap ko pehchano

Students se kaha gaya ke kaaghaz par chaar cheezein likhein: khoobiyan, kamzoriyan, dar aur khwab. Phir ChatGPT se kahein ke wo das sawal pooche aur imaandari se self-analysis kare — tareef ke baghair.

## Skill 2: AI ke saath kaam

Live demo mein AI **Projects** dikhaye gaye, aur prompt likhne ka formula: **Role, Context, Task, Format** — aur aakhir mein "ab apne jawab ki ghaltiyan dhoondo". AI kabhi kabhi poore yaqeen se ghalat baat bhi kehta hai, is liye har fact check karna zaroori hai.

## Har company ke liye alag CV

Ek hi CV har jagah bhejne ke bajaye, AI se companies ki research karein aur har company ke liye CV us ki zaroorat ke mutabiq banayein.

## Masle se business

Students ko ek prompt diya gaya: masla, customer, hal, qeemat, pitch aur pehli posts. Misaal di gayi apne mohalle ke kooray ke masle ki — jahan masla hai, wahin moqa hai.

## Hifazat

Password, OTP aur bank ki maloomat kisi ko nahi. Apps ki mic aur camera permissions check karein, aur yeh baat apne ghar walon ko bhi batayein.

## Denning ki taraf se feedback

Session ke baad Denning ki management ne apna paighaam record karwaya:

*"Hamare saath ek khoobsurat tajurba tha. Sir Raheel, TechNow ke CEO, ne AI aur AI ke istemal par session kiya, aur students ko dikhaya ke wo AI ko kis tarah istemal kar sakte hain."*

Students ke liye nabbe din ka challenge bhi rakha gaya — parhai ke saath, apni marzi se: pehle mahine ek skill, doosre mahine teen practice projects, teesre mahine pehla asal mauqa.

Shukriya Denning Institute Gujranwala ki management aur students ka. Mission jaari hai: **9 / 100**.